കേരളത്തിൽ കാലവർഷവും കനത്ത മഴയും കനക്കുമ്പോൾ റോഡുകളിൽ അപകടങ്ങൾ അസാധാരണമായി വർധിക്കാറുണ്ട്. പരിചയസമ്പന്നരായ ഡ്രൈവർമാർ പോലും അപ്രതീക്ഷിതമായി വാഹനത്തിന്റെ നിയന്ത്രണം നഷ്ടപ്പെട്ട് അപകടങ്ങളിൽപ്പെടുന്നു. പലപ്പോഴും ഇത്തരം അപകടങ്ങൾക്ക് പിന്നിലെ പ്രധാന കാരണം അതിവേഗമോ ശ്രദ്ധക്കുറവോ മാത്രം ആയിരിക്കണമെന്നില്ല. അതിന് പിന്നിൽ ‘അക്വാപ്ലാനിങ്’ അല്ലെങ്കിൽ ‘ഹൈഡ്രോപ്ലാനിങ്’ എന്ന ഭൗതിക പ്രതിഭാസമാണ്. നമ്മുടെ റോഡുകളിലെ ഡ്രെയിനേജ് സംവിധാനങ്ങളുടെ പോരായ്മയും പെട്ടെന്ന് പെയ്യുന്ന അതിതീവ്ര മഴയും കാരണം റോഡിൽ വെള്ളക്കെട്ടുകൾ രൂപപ്പെടുന്നത് പതിവാണ്. ഈ സാഹചര്യത്തിൽ എല്ലാ ഡ്രൈവർമാരും നിർബന്ധമായും അറിഞ്ഞിരിക്കേണ്ട ഒന്നാണ് അക്വാപ്ലാനിങ്.
എന്താണ് അക്വാപ്ലാനിങ്?
ഒരു വാഹനത്തിന്റെ ടയറുകളും റോഡിന്റെ ഉപരിതലവും തമ്മിലുള്ള നേരിട്ടുള്ള സമ്പർക്കം വെള്ളത്തിന്റെ ഒരു പാളി കാരണം വിച്ഛേദിക്കപ്പെടുന്ന അവസ്ഥയ്ക്കാണ് അക്വാപ്ലാനിങ് എന്ന് പറയുന്നത്. സാധാരണഗതിയിൽ വാഹനം ഓടുമ്പോൾ ടയറുകളിലെ ചാലുകൾ റോഡിലെ വെള്ളത്തെ വശങ്ങളിലേക്ക് തള്ളിമാറ്റുകയും ടയറിന് റോഡുമായി നല്ല ഗ്രിപ്പ് നൽകുകയും ചെയ്യുന്നു. എന്നാൽ, റോഡിൽ വെള്ളത്തിന്റെ അളവ് കൂടുതലാകുകയോ വാഹനത്തിന്റെ വേഗത വളരെ ഉയർന്നതാവുകയോ ചെയ്യുമ്പോൾ ടയറുകൾക്ക് ഈ വെള്ളത്തെ വേഗത്തിൽ നീക്കം ചെയ്യാൻ കഴിയാതെ വരുന്നു. ഇതിന്റെ ഫലമായി ടയറിനും റോഡിനും ഇടയിൽ വെള്ളത്തിന്റെ ശക്തമായ ഒരു സമ്മർദ്ദ പാളി രൂപപ്പെടുകയും വാഹനം വെള്ളത്തിന് മുകളിലൂടെ തെന്നി നീങ്ങുകയും ചെയ്യുന്നു. ഇതോടെ ഡ്രൈവർക്ക് വാഹനത്തിന്റെ സ്റ്റിയറിംഗിന്മേലോ ബ്രേക്കുകളിന്മേലോ യാതൊരുവിധ നിയന്ത്രണവും ഉണ്ടാകില്ല.
അക്വാപ്ലാനിങ് പെട്ടെന്ന് ഒരു നിമിഷം കൊണ്ട് സംഭവിക്കുന്ന ഒന്നാണ്. വേഗത തന്നെയാണ് ഇതിൽ ഏറ്റവും പ്രധാനപ്പെട്ട ഘടകം. വേഗത കൂടുംതോറും ടയറുകൾക്ക് റോഡിലെ വെള്ളം നീക്കം ചെയ്യാനുള്ള സമയം ലഭിക്കാതെ വരുന്നു. സാധാരണയായി ഉയർന്ന വേഗതയിൽ കനത്ത മഴയത്ത് ഡ്രൈവ് ചെയ്യുമ്പോൾ അക്വാപ്ലാനിങ് ഉണ്ടാകാനുള്ള സാധ്യത വളരെ കൂടുതലാണ്. ടയറുകളുടെ തേയ്മാനമാണ് മറ്റൊരു ഘടകം. പഴകി തേയ്മാനം സംഭവിച്ച ടയറുകളിൽ വെള്ളം നീക്കം ചെയ്യപ്പെടാതെ ടയറിനടിയിൽ തങ്ങിനിൽക്കുകയും ഇത് അപകടങ്ങൾക്ക് ഇടയാക്കുകയും ചെയ്യും.
ടയറുകളിലെ എയർ പ്രഷറിലെ വ്യതിയാനങ്ങളും റോഡിലെ അശാസ്ത്രീയമായ നിർമ്മാണം കാരണം രൂപപ്പെടുന്ന വെള്ളക്കെട്ടുകളും അക്വാപ്ലാനിങ് സാധ്യത വർദ്ധിപ്പിക്കുന്നു. കൂടാതെ, ഭാരം കുറഞ്ഞ ചെറിയ കാറുകൾക്ക് ഭാരമേറിയ വാഹനങ്ങളെ അപേക്ഷിച്ച് ഇത്തരം സാഹചര്യങ്ങളിൽ നിയന്ത്രണം നഷ്ടപ്പെടാനുള്ള സാധ്യത വളരെ കൂടുതലാണ്.
അക്വാപ്ലാനിങ് എങ്ങനെ തിരിച്ചറിയാം?
ഡ്രൈവ് ചെയ്യുന്നതിനിടയിൽ ചില മാറ്റങ്ങൾ ശ്രദ്ധിച്ചാൽ വാഹനം അക്വാപ്ലാനിങ്ങിൽ പെട്ടു എന്ന് മനസ്സിലാക്കാൻ സാധിക്കും. സ്റ്റിയറിംഗ് തിരിക്കാൻ യാതൊരു ആയാസവും ഇല്ലാത്തവിധം അത് പെട്ടെന്ന് വളരെ അയവുള്ളതായി അനുഭവപ്പെടുന്നത് പ്രധാന ലക്ഷണമാണ്. ടയറുകൾ വെള്ളത്തിൽ വഴുതി ഭ്രമണം ചെയ്യുന്നതിനാൽ എഞ്ചിന്റെ പ്രവർത്തനം വേഗത്തിലാവുകയും ആർ.പി.എം പെട്ടെന്ന് ഉയരുകയും ചെയ്യും. വാഹനം ഒരു വശത്തേക്ക് വഴുതിപ്പോകുന്നതായോ നിയന്ത്രണം വിട്ട് തെന്നുന്നതായോ തോന്നുമ്പോഴും വാഹനം അപകടകരമായ ഈ അവസ്ഥയിലാണെന്ന് തിരിച്ചറിയാം.
വാഹനം അക്വാപ്ലാനിങ്ങിൽ പെട്ടാൽ പരിഭ്രാന്തരാകാതെ ശാന്തത പാലിക്കുക എന്നതാണ് പ്രധാനം. ഈ ഘട്ടത്തിൽ ഒരിക്കലും ബ്രേക്കിൽ ശക്തമായി ചവിട്ടരുത്. ഇത് വാഹനം പൂർണ്ണമായും കരണം മറിയാനോ നിയന്ത്രണം വിട്ട് കറങ്ങാനോ ഇടയാക്കും. അതുപോലെ സ്റ്റിയറിംഗ് പെട്ടെന്ന് വെട്ടിക്കാനും പാടില്ല.
പകരം, ആക്സിലറേറ്ററിൽ നിന്ന് പതുക്കെ കാൽ മാറ്റുകയാണ് വേണ്ടത്. ഇതിലൂടെ വാഹനത്തിന്റെ വേഗത സ്വാഭാവികമായി കുറയും. വാഹനം നീങ്ങുന്ന ദിശയിലേക്ക് തന്നെ സ്റ്റിയറിംഗ് ഉറപ്പിച്ചു പിടിക്കുക. മാനുവൽ വാഹനമാണെങ്കിൽ ക്ലച്ച് അമർത്തുന്നത് എഞ്ചിനും ടയറും തമ്മിലുള്ള ബന്ധം വേർപെടുത്തി വേഗത കുറയ്ക്കാൻ സഹായിക്കും. വേഗത കുറയുന്നതോടെ ടയറുകൾ വെള്ളത്തെ തള്ളിമാറ്റി റോഡുമായി വീണ്ടും സമ്പർക്കത്തിലാകും. ഇതിന് ശേഷം മാത്രം വളരെ പതുക്കെ ബ്രേക്ക് ഉപയോഗിക്കാവുന്നതാണ്.
ജാഗ്രതയാണ് പ്രധാനം
മഴക്കാലത്ത് അക്വാപ്ലാനിങ് ഒഴിവാക്കാൻ ഡ്രൈവിംഗ് രീതികളിൽ ചില മുൻകരുതലുകൾ എടുക്കേണ്ടതുണ്ട്. മഴ പെയ്യുമ്പോൾ റോഡ് വിജനമാണെങ്കിലും വേഗത പരമാവധി കുറച്ച് ഡ്രൈവ് ചെയ്യുക. മഴക്കാലത്തിന് മുമ്പ് തന്നെ ടയറുകളുടെ പഴക്കം പരിശോധിക്കുകയും കൃത്യമായ എയർ പ്രഷർ നിലനിർത്തുകയും വേണം. ആധുനിക കാറുകളിലുള്ള ക്രൂയിസ് കൺട്രോൾ സംവിധാനം മഴയത്ത് പൂർണ്ണമായും ഒഴിവാക്കണം.
കനത്ത മഴയുള്ളപ്പോൾ മുൻപിൽ പോകുന്ന വാഹനം ഉണ്ടാക്കുന്ന ടയർ അടയാളങ്ങളിലൂടെ ഓടിക്കുന്നത് അക്വാപ്ലാനിങ് സാധ്യത കുറയ്ക്കും. മുൻപിലെ വാഹനം ആ ഭാഗത്തെ വെള്ളത്തെ താല്കാലികമായി തള്ളിമാറ്റിയിട്ടുണ്ടാകും എന്നതിനാലാണിത്. കൂടാതെ, മുൻപിലുള്ള വാഹനവുമായി സാധാരണയേക്കാൾ കൂടുതൽ അകലം പാലിക്കുന്നതും സുരക്ഷിതമായ യാത്ര ഉറപ്പാക്കും. കേരളത്തിൽ അതിതീവ്ര പെയ്ത്തുകൾ പതിവായിക്കൊണ്ടിരിക്കുന്ന സാഹചര്യത്തിൽ റോഡപകടങ്ങൾ കുറയ്ക്കാൻ ഡ്രൈവിംഗ് ശീലങ്ങളിൽ മാറ്റം വരുത്തേണ്ടത് അത്യാവശ്യമാണ്. റോഡിലെ വെള്ളക്കെട്ടുകൾ വലിയ അപകടക്കെണിയാണെന്ന് തിരിച്ചറിയണം.
