ന്യൂഡൽഹി: ലോകായുക്ത എസ്‌പി ആയിരിക്കെ ഭീഷണിപ്പെടുത്തി പണം തട്ടിയെന്ന കേസിൽ ഐ.പി.എസ് ഉദ്യോഗസ്ഥൻ ശ്രീനാഥ് ജോഷി മഹാദേവിന് കർണാടക ഹൈക്കോടതി അനുവദിച്ച മുൻകൂർ ജാമ്യം സുപ്രീം കോടതി റദ്ദാക്കി. കർണാടക ലോകായുക്ത പോലീസ് സമർപ്പിച്ച ഹർജി അംഗീകരിച്ചുകൊണ്ടാണ് ജസ്റ്റിസ് സഞ്ജയ് കുമാർ, ജസ്റ്റിസ് സഞ്ജീവ് സച്ദേവ എന്നിവരടങ്ങിയ ബെഞ്ചിന്റെ നടപടി.
കുറ്റം നടന്നതായി ആരോപിക്കപ്പെടുന്ന സമയത്ത് ലോകായുക്ത പോലീസിൽ സൂപ്രണ്ട് ഓഫ് പോലീസ് പദവി വഹിച്ചിരുന്ന ഉദ്യോഗസ്ഥന് സാധാരണക്കാരന്റെ പരിഗണന ലഭിക്കില്ലെന്ന് കോടതി വ്യക്തമാക്കി. ഇദ്ദേഹത്തിനെതിരായ അഴിമതിയും ഔദ്യോഗിക പദവി ദുരുപയോഗം ചെയ്തെന്ന ആരോപണവും ഗൗരവകരമായി കാണേണ്ടതുണ്ടെന്നും ബെഞ്ച് നിരീക്ഷിച്ചു.
ഒരു സേനാംഗവും സൂപ്രണ്ട് ഓഫ് പോലീസ് റാങ്കിലുള്ള മുതിർന്ന ഉദ്യോഗസ്ഥനുമാണ് എതിർകക്ഷിയെന്നും ലോകായുക്ത പോലുള്ള ഒരു സംവിധാനത്തിനുള്ളിൽ നിന്ന് തന്നെ പദവി ദുരുപയോഗം ചെയ്തുവെന്ന ഗുരുതരമായ ആരോപണമാണ് ഇയാൾക്കെതിരെ ഉയർന്നതെന്നും സുപ്രീം കോടതി നിരീക്ഷിച്ചു. അഴിമതി തടയുക എന്ന ഉദ്ദേശത്തോടെ പ്രവർത്തിക്കുന്ന ഒരു സ്ഥാപനത്തിൽ തന്നെ ഇത്തരമൊരു അഴിമതി നടന്നു എന്ന ആരോപണം ഗൗരവമായിത്തന്നെ പരിശോധിക്കേണ്ടതുണ്ടെന്ന് വിധിന്യായത്തിൽ പറയുന്നു. ഒരു സാധാരണക്കാരന് ലഭിക്കുന്ന തരത്തിലുള്ള ജാമ്യ പരിഗണനകൾക്ക് ഒരു സേനാംഗമായ ഇയാൾക്ക് അർഹതയില്ല എന്നും വിധിന്യായത്തിൽ പരാമർശമുണ്ട്.
പ്രോസിക്യൂഷൻ ഹാജരാക്കിയ സുപ്രധാന തെളിവുകൾ അവഗണിച്ചുകൊണ്ടാണ് ഹൈക്കോടതി ജോഷിക്ക് മുൻകൂർ ജാമ്യം നൽകിയതെന്ന് സുപ്രീം കോടതി ചൂണ്ടിക്കാട്ടി. ചോദ്യം ചെയ്യലിനായി ഇയാളെ കസ്റ്റഡിയിൽ എടുക്കേണ്ടതിന്റെ ആവശ്യകത ഒഴിവാക്കാൻ ഹൈക്കോടതിക്ക് കഴിയില്ലായിരുന്നുവെന്നും കോടതി നിരീക്ഷിച്ചു. സർവീസിൽ നിന്ന് പുറത്താക്കപ്പെട്ട ഒന്നാം പ്രതിയും മുൻ പോലീസ് കോൺസ്റ്റബിളുമായ നിംഗപ്പ സാവന്ത എന്ന വ്യക്തി ജോഷിയുമായി നിരന്തരം ബന്ധപ്പെട്ടിരുന്നതായും അദ്ദേഹത്തിന്റെ ഓഫീസിൽ സന്ദർശനം നടത്തിയിരുന്നതായും തെളിവുകൾ ഉണ്ട്. ഹൈക്കോടതി ഉത്തരവ് റദ്ദാക്കിയ സുപ്രീം കോടതി, മൂന്ന് ആഴ്ചയ്ക്കുള്ളിൽ കീഴടങ്ങാൻ ശ്രീനാഥ് ജോഷിയോട് നിർദ്ദേശിച്ചു.
