ന്യൂഡൽഹി: നീറ്റ്-യുജി 2026 ചോദ്യപേപ്പർ ചോർച്ച വിവാദത്തിന്റെയും സിജെപി പ്രതിഷേധങ്ങളുടെയും പശ്ചാത്തലത്തിൽ പരീക്ഷാ നടത്തിപ്പിന്റെ സുരക്ഷ കൂടുതൽ ശക്തമാക്കാൻ ദേശീയ ടെസ്റ്റിങ് ഏജൻസി. 24 മണിക്കൂറും പ്രവർത്തിക്കുന്ന സുരക്ഷാ സംവിധാനങ്ങൾ ഒരുക്കുന്നതിനായി പ്രൊഫഷണൽ ഏജൻസിയെ നിയമിക്കാൻ ഏകദേശം 7.5 കോടി രൂപയുടെ ടെൻഡർ എൻടിഎ ക്ഷണിച്ചു. ഡൽഹിയിലെ എൻടിഎ ആസ്ഥാനത്തിന് പുറമെ പ്രാദേശിക ഓഫീസുകളിലും മറ്റ് നിർണായക കേന്ദ്രങ്ങളിലും സുരക്ഷ ഉറപ്പാക്കുന്നതിനാണ് പുതിയ നടപടി. പരീക്ഷാ സംവിധാനത്തിന്റെ വിശ്വാസ്യതയും ചോദ്യപേപ്പറുകളുടെയും മറ്റ് രഹസ്യ രേഖകളുടെയും സുരക്ഷയും ഉറപ്പാക്കുന്നതിന്റെ ഭാഗമായാണ് വിപുലമായ നടപടികൾ സ്വീകരിക്കുന്നത്.
ജൂലൈ 25ന് പുറത്തിറക്കിയ ടെൻഡർ പ്രകാരം, ഡൽഹി മിന്റോ റോഡിലെ എൻടിഎ ആസ്ഥാനം, ഒഖ്‌ലയിലെ പ്രാദേശിക ഓഫീസ്, എൻടിഎ പിന്നീട് നിർദേശിക്കുന്ന മറ്റ് കേന്ദ്രങ്ങൾ എന്നിവിടങ്ങളിൽ സുരക്ഷാ സേവനം നൽകേണ്ടത് തിരഞ്ഞെടുക്കപ്പെടുന്ന ഏജൻസിയുടെ ചുമതലയായിരിക്കും. ജീവനക്കാരുടെയും സന്ദർശകരുടെയും സുരക്ഷയ്ക്കൊപ്പം പരീക്ഷയുമായി ബന്ധപ്പെട്ട രഹസ്യ സാമഗ്രികൾ, സെർവർ മുറികൾ, സ്ട്രോങ് റൂമുകൾ, വെയർഹൗസുകൾ, റെക്കോർഡ് റൂമുകൾ തുടങ്ങിയ അതീവ സുരക്ഷ ആവശ്യമുള്ള ഇടങ്ങളുടെയും സംരക്ഷണം ഏജൻസി ഉറപ്പാക്കണം.
പ്രാഥമികമായി രണ്ട് വർഷത്തേക്കായിരിക്കും കരാർ. സേവനം തൃപ്തികരമാണെങ്കിൽ ഒരു വർഷം വീതം രണ്ട് തവണ കരാർ നീട്ടാനുള്ള വ്യവസ്ഥയും ടെൻഡറിൽ ഉൾപ്പെടുത്തിയിട്ടുണ്ട്. താൽപര്യമുള്ള ഏജൻസികൾക്ക് ഓഗസ്റ്റ് 17ന് ഉച്ചയ്ക്ക് മൂന്ന് മണിവരെ ടെൻഡർ സമർപ്പിക്കാം. അന്നുതന്നെ സാങ്കേതിക ബിഡുകൾ തുറക്കും.
സുരക്ഷാ സേവനങ്ങൾക്ക് പുറമെ പരീക്ഷാ നടത്തിപ്പുമായി ബന്ധപ്പെട്ട മറ്റ് മേഖലകളിലും എൻടിഎ പുതിയ ടെൻഡർ നടപടികൾ ആരംഭിച്ചിട്ടുണ്ട്. ഹൗസ് കീപ്പിങ് സേവനങ്ങൾക്കും സുരക്ഷാ സേവനങ്ങൾക്കും പരീക്ഷാ നിലവാരത്തിലുള്ള അച്ചടി സേവനങ്ങൾക്കുമായി പ്രത്യേകം ടെൻഡറുകൾ ക്ഷണിച്ചതായി എൻടിഎ ഔദ്യോഗിക സോഷ്യൽ മീഡിയ അക്കൗണ്ടുകളിലൂടെ അറിയിച്ചു. സർക്കാർ ഇ-മാർക്കറ്റ്‌പ്ലേസ് (GeM) പ്ലാറ്റ്‌ഫോം വഴിയാണ് ഈ സേവനങ്ങൾക്കായുള്ള ടെൻഡർ നടപടികൾ ആരംഭിച്ചിരിക്കുന്നത്. ഡൽഹിയിലെ എൻടിഎ ഓഫീസുകളിലേക്കുള്ള സുരക്ഷാ, ഹൗസ് കീപ്പിങ് സേവനങ്ങളുടെ ടെൻഡർ സമർപ്പിക്കാനുള്ള അവസാന തീയതി ഓഗസ്റ്റ് 17 ആണ്. പരീക്ഷാ ആവശ്യങ്ങൾക്കുള്ള അച്ചടി സേവനങ്ങളുടെ ടെൻഡറിന് ഓഗസ്റ്റ് 20 വരെയാണ് ബിഡ് സമർപ്പിക്കാനുള്ള സമയം.
രാജ്യത്തെ പ്രധാന പ്രവേശന പരീക്ഷകളുടെ നടത്തിപ്പ് ചുമതലയുള്ള എൻടിഎയുടെ പ്രവർത്തനങ്ങളെക്കുറിച്ച് വലിയ ആക്ഷേപങ്ങൾ ഉയർന്നത് ഏജൻസിക്ക് വലിയ നാണക്കേടുണ്ടാക്കിയിരുന്നു. പരീക്ഷാ ചോദ്യപേപ്പറുകളുടെ സുരക്ഷ, പരീക്ഷാ കേന്ദ്രങ്ങളിലെ ക്രമീകരണങ്ങൾ, പരീക്ഷാ നടത്തിപ്പിലെ സുതാര്യത എന്നിവ സംബന്ധിച്ച ആശങ്കകൾ ശക്തമായ സാഹചര്യത്തിലാണ് സുരക്ഷാ സംവിധാനങ്ങൾ കൂടുതൽ ശക്തിപ്പെടുത്താനുള്ള ഏജൻസിയുടെ നീക്കം.
പരീക്ഷാ സംവിധാനത്തിന്റെ എല്ലാ ഘട്ടങ്ങളിലും സുരക്ഷ ഉറപ്പാക്കുന്നതിനും രഹസ്യ വിവരങ്ങളും പരീക്ഷാ സാമഗ്രികളും സംരക്ഷിക്കുന്നതിനും പുതിയ നടപടികൾ സഹായിക്കുമെന്നാണ് എൻടിഎയുടെ വിലയിരുത്തൽ. സുരക്ഷാ സേവനങ്ങൾക്കായി പ്രൊഫഷണൽ ഏജൻസിയെ നിയോഗിക്കുന്നതിലൂടെ എൻടിഎയുടെ വിവിധ ഓഫീസുകളിലും നിർണായക കേന്ദ്രങ്ങളിലും ഏകീകൃതമായ സുരക്ഷാ സംവിധാനമാണ് ലക്ഷ്യമിടുന്നത്.
