ന്യൂഡൽഹി: ഓണം അടുത്തെത്തിയതോടെ ഉത്തരേന്ത്യയിൽ നിന്ന് കേരളത്തിലേക്കുള്ള യാത്ര മലയാളി കുടുംബങ്ങൾക്ക് വീണ്ടും വലിയ വെല്ലുവിളിയായി മാറുന്നു. ഡൽഹി ഉൾപ്പെടെയുള്ള ഉത്തരേന്ത്യൻ നഗരങ്ങളിൽ നിന്ന് നാട്ടിലേക്ക് മടങ്ങാൻ ഒരുങ്ങുന്നവർക്ക് ട്രെയിൻ ടിക്കറ്റ് ലഭ്യതയാണ് പ്രധാന പ്രതിസന്ധിയെങ്കിൽ അവസാന നിമിഷം വിമാനയാത്രയെ ആശ്രയിക്കുന്നവർക്ക് ഉയർന്ന നിരക്ക് മറ്റൊരു തിരിച്ചടിയാകുകയാണ്. കുടുംബമായി യാത്ര ചെയ്യുന്നവർക്ക് ഓണക്കാല യാത്രാ ചെലവ് താങ്ങാനാവാത്ത സ്ഥിതിയിലാണ്.
ഓണക്കാലത്ത് രാജ്യത്തിന്റെ വിവിധ ഭാഗങ്ങളിൽ ജോലി ചെയ്യുകയും പഠിക്കുകയും ചെയ്യുന്ന മലയാളികൾ നാട്ടിലേക്ക് മടങ്ങുന്നത് പതിവാണ്. ഡൽഹി, നോയിഡ, ഗുഡ്ഗാവ്, ചണ്ഡിഗഡ്, ജയ്പൂർ തുടങ്ങിയ ഉത്തരേന്ത്യൻ നഗരങ്ങളിൽ താമസിക്കുന്ന മലയാളി കുടുംബങ്ങൾക്കൊപ്പം വിദ്യാർഥികളും തൊഴിലാളികളും ഉൾപ്പെടെ വലിയൊരു വിഭാഗമാണ് ഓണത്തിന് കേരളത്തിലേക്ക് യാത്ര ചെയ്യുന്നത്. ഇതോടെ ഓണക്കാലത്ത് കേരളത്തിലേക്കുള്ള ദീർഘദൂര ട്രെയിനുകളിലും വിമാനങ്ങളിലും ആവശ്യകത കുത്തനെ ഉയരാറുണ്ട്. ഇത്തവണയും സ്ഥിതി വ്യത്യസ്തമല്ല. നേരത്തെ ബുക്ക് ചെയ്യാൻ ശ്രമിച്ചിട്ട് പോലും പലർക്കും ട്രെയിനിൽ കൺഫേംഡ് ടിക്കറ്റ് ലഭിക്കുക പ്രയാസമായിരിക്കുകയാണ്. മാസങ്ങൾക്കു മുമ്പ് ബുക്ക് ചെയ്ത ടിക്കറ്റുകൾ പോലും വെയിറ്റിങ് ലിസ്റ്റിൽ തുടരുന്ന സാഹചര്യമുണ്ട്.
ഡൽഹിയിൽ നിന്ന് കേരളത്തിലേക്കുള്ള പ്രധാന റെയിൽ കണക്ഷനുകളിൽ കേരള എക്സ്പ്രസ്, മംഗള ലക്ഷദ്വീപ് എക്സ്പ്രസ്, നിസാമുദ്ദീൻ-തിരുവനന്തപുരം സർവീസുകൾ, മറ്റ് ദക്ഷിണേന്ത്യൻ റൂട്ടുകളുമായി ബന്ധിപ്പിക്കുന്ന ട്രെയിനുകൾ എന്നിവയ്ക്കാണ് ഓണക്കാലത്ത് വലിയ ആവശ്യകത. യാത്രക്കാരുടെ എണ്ണം കൂടുന്നതിനനുസരിച്ച് സ്ലീപ്പർ ക്ലാസിനൊപ്പം എസി കോച്ചുകൾക്കും ആവശ്യക്കാർ വർധിക്കുന്നു. ദീർഘദൂര യാത്രയായതിനാൽ തന്നെ പൊതുവെ തേഡ് എസി, സെക്കൻഡ് എസി വിഭാഗങ്ങളെയാണ് കൂടുതലായി എല്ലാവരും ആശ്രയിക്കുന്നത്.
100 സ്പെഷ്യൽ ട്രെയിനുകൾ; ഡൽഹി-കേരള റൂട്ടിൽ പ്രതീക്ഷിച്ച ആശ്വാസമില്ല
ഓണക്കാലത്തെ അധിക യാത്രാ തിരക്ക് പരിഹരിക്കുന്നതിനായി രാജ്യത്തിന്റെ വിവിധ ഭാഗങ്ങളിൽ നിന്ന് കേരളത്തിലേക്ക് 100 സ്പെഷ്യൽ ട്രെയിനുകൾ സർവീസ് നടത്തുമെന്ന് റെയിൽവേ മന്ത്രി അശ്വിനി വൈഷ്ണവ് പ്രഖ്യാപിച്ചിരുന്നു. എന്നാൽ പ്രഖ്യാപനത്തിന്റെ ഗുണം എല്ലാ പ്രധാന റൂട്ടുകളിലും ഒരേ രീതിയിൽ ലഭിച്ചിട്ടില്ലെന്ന പരാതിയാണ് യാത്രക്കാരിൽനിന്ന് ഉയരുന്നത്. ദക്ഷിണ റെയിൽവേയുടെ നേതൃത്വത്തിൽ ഓണക്കാലത്ത് വിവിധ പ്രത്യേക സർവീസുകൾ പ്രഖ്യാപിച്ചിട്ടുണ്ടെങ്കിലും, ഡൽഹിയിൽ നിന്ന് കേരളത്തിലേക്കുള്ള ദീർഘദൂര യാത്രക്കാരുടെ പ്രതീക്ഷയ്ക്കനുസരിച്ചുള്ള അധിക സർവീസുകൾ ലഭിച്ചിട്ടില്ലെന്നതാണ് പ്രധാന പരാതി. നേരത്തെ പ്രഖ്യാപിച്ച 100 സ്പെഷ്യൽ ട്രെയിനുകളിൽ ചിലത് കേരളത്തിന്റെ വിവിധ ഭാഗങ്ങളിലേക്കുള്ള കണക്റ്റിവിറ്റി മെച്ചപ്പെടുത്തുന്നതിനാണ് ലക്ഷ്യമിട്ടത്.
ഇതിന്റെ ഭാഗമായി മംഗളൂരു-ചെന്നൈ എഗ്മോർ, എഗ്മോർ-മംഗളൂരു റൂട്ടുകളിൽ പ്രത്യേക ട്രെയിനുകൾ പ്രഖ്യാപിച്ചിട്ടുണ്ട്. ജൂലൈ 13 മുതൽ ഓഗസ്റ്റ് 31 വരെ മംഗളൂരുവിൽ നിന്ന് എഗ്മോറിലേക്കും ജൂലൈ 14 മുതൽ സെപ്റ്റംബർ 1 വരെ എഗ്മോറിൽ നിന്ന് മംഗളൂരുവിലേക്കും സർവീസുകൾ നടത്താനാണ് തീരുമാനം. ഈ ട്രെയിനുകൾക്ക് കേരളത്തിലെ കോഴിക്കോട്, തിരൂർ, പാലക്കാട് തുടങ്ങിയ സ്റ്റേഷനുകളിൽ സ്റ്റോപ്പുകളുണ്ട്. എന്നാൽ ഡൽഹി-കേരള റൂട്ടിൽ നേരിട്ടുള്ള അധിക സർവീസുകൾ പ്രതീക്ഷിച്ചിരുന്ന യാത്രക്കാർക്ക് ഇതിലൂടെ കാര്യമായ ആശ്വാസം ലഭിക്കുന്നില്ല.
പ്രത്യേക ട്രെയിനുകൾ പ്രഖ്യാപിച്ചിട്ടും അവയുടെ റൂട്ടും സമയക്രമവും യാത്രക്കാരുടെ ആവശ്യവുമായി പൊരുത്തപ്പെടുന്നില്ലെങ്കിൽ പ്രതിസന്ധിക്ക് പൂർണ പരിഹാരമാകില്ലെന്നാണ് യാത്രക്കാരുടെ വിലയിരുത്തൽ. പ്രത്യേകിച്ച് കേരളത്തിന്റെ വടക്കൻ ജില്ലകളിലേക്ക് യാത്ര ചെയ്യുന്ന ഡൽഹി മലയാളികൾക്ക് ദീർഘദൂര യാത്രയ്ക്ക് ശേഷം വീണ്ടും മറ്റൊരു ട്രെയിനോ ബസോ ആശ്രയിക്കേണ്ടി വരുന്നതും ബുദ്ധിമുട്ട് വർധിപ്പിക്കുന്നു.
വിമാനയാത്രാനിരക്കുകൾ മാനം മുട്ടുന്നു
ട്രെയിനിൽ ടിക്കറ്റ് ലഭിക്കാത്തവർക്ക് മുന്നിലുള്ള പ്രധാന ബദൽ വിമാന യാത്രയാണ്. എന്നാൽ ഓണക്കാലത്തെ ഉയർന്ന ആവശ്യകത കാരണം വിമാനയാത്ര പല കുടുംബങ്ങൾക്കും വലിയ സാമ്പത്തിക ബാധ്യതയായി മാറുന്നു. ഡൽഹിയിൽ നിന്ന് കൊച്ചിയിലേക്കുള്ള വിമാന സർവീസുകളുടെ ഔദ്യോഗിക ബുക്കിങ് പേജുകളിൽ ഓഗസ്റ്റ് മാസത്തേക്കുള്ള വൺവേ നിരക്കുകൾ ഏകദേശം ₹11,000 മുതലാണ് ആരംഭിക്കുന്നത്. എന്നാൽ യാത്രാ തീയതി അടുത്തുവരുന്നതനുസരിച്ചും സീറ്റുകളുടെ ലഭ്യത കുറയുന്നതിനനുസരിച്ചും നിരക്ക് ഇനിയും ഉയരും.
മാതാപിതാക്കളും രണ്ട് കുട്ടികളും അടങ്ങുന്ന നാലംഗ കുടുംബം വിമാനത്തിൽ കേരളത്തിലേക്ക് പോയി മടങ്ങുകയാണെങ്കിൽ, നാല് പേരുടെയും ഇരുവഴിയുള്ള ടിക്കറ്റ് ചെലവ് മാത്രം തന്നെ വലിയ തുകയാകും. ഇതിന് പുറമെ വിമാനത്താവളത്തിലേക്കും തിരിച്ചുമുള്ള യാത്ര, ലഗേജ് ചാർജുകൾ, ഭക്ഷണം തുടങ്ങിയ ചെലവുകളും വരും. ഓണാഘോഷത്തിനായി കുറച്ച് ദിവസത്തേക്ക് മാത്രം നാട്ടിലെത്തുന്ന കുടുംബങ്ങളുടെ വാർഷിക ബജറ്റ് തന്നെ താളം തെറ്റുന്ന നിലയാണ്.
