കണ്ണൂർ: പരിയാരത്ത് സ്ഥിതി ചെയ്യുന്ന കണ്ണൂർ ഗവ. മെഡിക്കൽ കോളജ് ആശുപത്രിയിൽ കാൻസർ രോഗിയായ എഴുപതുകാരി കൂട്ട ബലാൽത്സംഗത്തിന് ഇരയായതായി പരാതി. ചികിത്സയിൽ കഴിയുകയായിരുന്ന വൃദ്ധയെ ആശുപത്രി ജീവനക്കാരടക്കമുള്ളവർ ബലാൽത്സംഗം ചെയ്തതായാണ് പരാതി. ഒരാഴ്ചയ്ക്ക് മുൻപേ നടന്ന സംഭവം ചർച്ച നടത്തി പരിഹരിക്കാൻ ശ്രമിച്ചതായും വിവരമുണ്ട്. നിലവിൽ പരാതിയിന്മേൽ പരിയാരം മെഡിക്കൽ കോളജ് പോലീസ് ബിഎൻഎസ് സെക്ഷൻ 70(1) പ്രകാരം എഫ്ഐആർ രജിസ്റ്റർ ചെയ്തിട്ടുണ്ട്. പയ്യന്നൂർ ഡിവൈഎസ്‌പി പി.കെ. മണിയുടെ നേതൃത്വത്തിലാണ് അന്വേഷണം നടക്കുന്നത്.
ആശുപത്രിയിൽ വച്ച് നടന്നതായി പരാതിയിൽ പറയുന്ന കുറ്റകൃത്യത്തിന് കാര്യമായ സാക്ഷികളോ മറ്റ് തെളിവുകളോ ഇതുവരെ മെഡിക്കൽ കോളേജ് പൊലീസിന് കണ്ടെത്താൻ കഴിഞ്ഞിട്ടില്ല. ഇതിന് പിന്നാലെയാണ് പയ്യന്നൂർ ഡിവൈഎസ്‌പിയുടെ നേതൃത്വത്തിലുള്ള സംഘം അന്വേഷണം ഏറ്റെടുത്തിരിക്കുന്നത്.
